17 Mai – 26 Mehefin – Arddangosfa Hen Dai (I)
Agoriad llygad i’r cyfoeth sydd wrth ein traed yn Uwchgwyrfai, sef plwyfi Llanaelhaearn, Clynnog, Llanllyfni, Llandwrog a Llanwnda:
Hanes Plas Elerninon, Trefor am fil o flynyddoedd, a rhestr o’r tenantiaid a’r perchnogion o’r flwyddyn 1377.
Lluniau a hanes rhyfeddol dau hen, hen dŷ ym Mhen-y-groes.
Hanes diddorol Maenor Cwm. (Rhoddwyd trefgordd Cwm gan Lywelyn Fawr i fynaich Abaty Aberconwy drwy siarter ym 1198).
Hanes tai a thyddynnod unigol.
Lluniau tai’r Rheilffordd.
A llawer mwy.
Hefyd dangoswyd lluniau dyfrlliw o dai o waith William Selwyn, Robert Williams (Pen-y-groes), Jasmine Hughes (Llandegfan) a Carol Hughes (Y Groeslon) a llun diweddar Karen Jones (Waun-fawr) mewn enamel a gwydr.
Oriau Agor: Mercher a Sadwrn 1.30 – 4 o’r gloch Tâl Mynediad i’r Arddangosfa a’r Ardd Gymunedol Hanesyddol: £2 Plant am ddim
Nos Sul, 29 Mehefin – Noson Cyhoeddi CD Cantorion Bro’r Eifl
Gwrandawyd ar yr holl gynnwys o’i gwr a chafwyd lluniau PowerPoint a sylwadau perthnasol ar y cantorion a’r caneuon gan Geraint Jones. Mae’r recordiadau fel ag y’u cafwyd (mwy neu lai). Mae’n galondid eu bod bellach ar gof a chadw i bawb fel y cadwer i’r oesoedd a ddêl beth o’r glendid a fu a hynny yn y Gymru ryfedd hon sy’n gynyddol ddibris o’i hetifeddiaeth a’i hen ddiwylliant gwâr. Mynediad am ddim oherwydd y gwerthwyd CD (pris £10) ar ddiwedd y cyfarfod. Ond roedd angen archebu tocyn ymlaen llaw gan mai lle i nifer cyfyngedig sydd yn yr Ysgoldy.
Cynnwys y CD: Y Cantorion (yn nhrefn yr wyddor): George Baum, Trefor Tal Griffith, Llithfaen Arthur Jones, Llanaelhaearn / Llanrug Dafydd Morris Jones, Wernol, Chwilog Elwyn Jones, Llanaelhaearn / Llanbedrog Emlyn Jones, Llanaelhaearn / Morfa Nefyn Jane Jones, Trefor / Pwllheli William Jones (Wil Parsal), Trefor Gwen Owen, Pencaenewydd Ithel Parry, Y Ffôr Bobi Roberts, Hafod, Llithfaen H.E.Roberts (Tenorydd yr Eifl), Llithfaen Evan R. Thomas, Llanaelhaearn / Y Ffôr Lottie Thomas, Trefor / Y Ffôr Mathias Williams, Trefor Tom Williams, Llwyn Annas, Chwilog William R. Williams (Llwyn), Pistyll Côr Glannau Erch (Tal Griffith)
26 Medi – cyhoeddi cryno-ddisg, Rhif 1, Beirdd Bro: Myrddin ap Dafydd
Yn Nhafarn y Fic, Llithfaen pryd y gwelwyd cyhoeddi llyfr a chryno-ddisg a chlywed y bardd yn darllen rhai o’i gerddi:
Bore Newydd: casgliad newydd o gerddi Myrddin ap Dafydd. Cyhoeddwyr: Gwasg Carreg Gwalch.
Cryno ddisg, Rhif 1, Beirdd Bro: 33 o gerddi Myrddin ap Dafydd yn cael eu darllen, gyda gair o gyflwyniad i bob cerdd, gan y bardd ei hun. Y rhyfeddod yw bod cymaint o amrywiaeth yn nhestunau a mesurau’r cerddi a bod y cynnwys yn gofiadwy ac ysbrydoledig ac mor hawdd gwrando arnynt. Braint fawr oedd eu cyhoeddi yng Ngwasg yr Utgorn, Canolfan Hanes Uwchgwyrfai.
Medi – 18 Hydref Arddangosfa Hen Dai II
Ar brynhawniau Mercher a Sadwrn 1.30 – 4 o’r gloch. Parhad oedd hon o’n harddangosfa flaenorol (Mai/Mehefin) ac roedd yn cynnwys peth gwybodaeth a lluniau newydd hynod ddiddorol.Rhoddwyd cyfle i ysgolion a chymdeithasau drefnu ymweliadau ymlaen llaw.
29 Hydref – Noson cyhoeddi cryno-disg Emlyn a Harri: Byd y Baledi a Byd y Llofft Stabal
Yn Neuadd Sarn Meillteyrn yng nghwmni Emlyn a Harri Richards. Mynediad, paned a llond gwlad o hwyl Cymreig AM DDIM!
5 Tachwedd – Noson cyhoeddi “Gwr Hynod Uwchlaw’rffynnon” gan Geraint Jones
Dathlu cyhoeddi cyfrol hardd, llawn lluniau lliw, yn cyflwyno hanes Robert Hughes o Lanaelhaearn – porthmon, ffarmwr, bardd, pregethwr, darlithydd, achyddwr, areithiwr dirwest – ac arlunydd gwlad. Dyn hynod yn wir! Cynhwysir holl achau’r teulu lluosog.
Y noson hon dangoswyd dros drigain o ddarluniau Robert Hughes ar y sgrin fawr sydd yn y Ganolfan a chafwyd gair neu ddau gan yr awdur, Geraint Jones, am rai o’r cymeriadau hynod a’r golygfeydd “rhyfeddol”. Cyhoeddwyd gan Wasg Carreg Gwalch. Pris y llyfr: £9.50 (£11.50 trwy’r post o’r cyfeiriad hwn: Canolfan Hanes Uwchgwyrfai, Clynnog Fawr, Caernarfon, Gwynedd. Ll54 5BT
25 Tachwedd – Noson cyhoeddi “Am y Tywydd” gan Twm Elias
Gwahoddiad gan Wasg Carreg Gwalch i ddod drwy’r eira mawr a’r rhew a niwloedd Tachwedd a sgrympiau Gŵyl Grog i ddathlu cyhoeddi’r casgliad swmpus hwn o ddywediadau difyr – testun sgyrsiau am genedlaethau!
Cafwyd cyflwyniad Powerpoint gan yr awdur a phaned a mins pei. Pris y llyfr: £12 – ar werth gan y Ganolfan ar y noson. Mynediad am ddim.
Nos Sadwrn, 6 Rhagfyr 2008 Noson cyhoeddi “Teulu’r Post Llanwnda” gan Aelwen Roberts yng Nghanolfan Bro Llanwnda
Gwahoddiad gan Wasg yr Utgorn, Canolfan Hanes Uwchgwyrfai, i ddathlu cyhoeddi llyfryn sydd yn portreadu pedair cenhedlaeth yn hanes Swyddfa’r Post, Llanwnda a gaewyd yn Nhachwedd 2008.
Cafwyd cyflwyniad gan Aelwen Roberts a chymerwyd rhan gan aelodau ifainc o deulu’r Post – dau ohonynt yn aelodau o Gôr Glanaethwy – unawd ar y piano gan Miriam, carol gan y ddau frawd Ifan ac Emyr Jones a’u cyfyrder Dafydd Siôn, yna unawd gan Emyr i gyfeiliant Siân Wyn Gibson. Mwynhawyd paned a mins pei ar y diwedd. Mynediad am ddim. Pris y llyfr £4.
16 Rhagfyr 2008 – Cyflwyno (i) Ellyll Hyll a Ballu (Mary Hughes)
Llyfr chwedlau Uwchgwyrfai a ysgrifennwyd i blant gan Mary Hughes ac a gyhoeddwyd yn Ysgol Brynaerau yng nghwmni Ysgolion Carmel a’r Groeslon. Darllenodd yr awdur un o’r chwedlau. Yr oedd yr arlunydd, Jasmine Hughes hefyd yn bresennol – arluniodd 12 llun lliw hardd ac 8 du a gwyn i gyd-fynd â’r chwedlau. Maint y llyfr: A5, 52 tudalen. Pris £5. Cyhoeddwyd gan Wasg yr Utgorn, Canolfan Hanes Uwchgwyrfai.
(ii) Llyfr Lliwio i Blant gan Dafydd Jones 12 llun i’w lliwio:
Trol a cheffyl Pen’rallt Uchaf, Clynnog Fawr Trol a mul Diwrnod dyrnu Siop yn Nhal-y-sarn Amser chwarae yn Ysgol Gynradd Pen-y-groes Maen Dylan Cromlech Bachwen Chwarelwr yn hollti llechi Gwerthu llefrith ym Mhen-y-groes Capel Eglwys Beuno Sant
Pris: £2 A4 12 tudalen Cyhoeddwyd eto gan Wasg yr Utgorn.